2 ოქტომბერს, 20:00 საათზე, თბილისის ოპერისა და ბალეტის სახელმწიფო თეატრში 167-ე სეზონი ტრადიციულად ზაქარია ფალიაშვილის ოპერით „აბესალომ და ეთერი“ გაიხსნება. სპექტაკლი ეძღვნება გამოჩენილი ქართველი ტენორის ზურაბ სოტკილავას ხსოვნას.

„აბესალომ და ეთერიში“ მონაწილეობას მიიღებენ: საქართველოს სახალხო არტისტი თეიმურაზ გუგუშვილი, ოპერის თეატრის სოლისტები: ხათუნა ჭოხონელიძე, სულხან გველესიანი, ირინა ალექსიძე, გოჩა დათუსანი, მარიკა მაჩიტიძე, მანანა იორდანიშვილი, თამაზ საგინაძე, გია მახარაძე, გივი ფეიქრიშვილი; ოპერის თეატრის ორკესტრი, გუნდი, საბალეტო დასი და ქართული ნაციონალური ბალეტი „სუხიშვილები“.

სპექტაკლის დამდგმელი დირიჟორია ზაზა აზმაიფარაშვილი (თეატრის მთავარი დირიჟორი), დამდგმელი რეჟისორი გიზო ჟორდანია, დამდგმელი მხატვარი გიორგი ალექსი-მესხიშვილი, დამდგმელი ქორეოგრაფი ილიკო სუხიშვილი, ვიდეოპროექცია დავით მაჭავარიანი.

„აბესალომ და ეთერის“ ამ დადგმის პრემიერა 2016 წლის 30 იანვარს განახლებული ოპერის თეატრის გახსნაზე გაიმართა და უდიდესი წარმატება ხვდა წილად.