ხორვატიის პრეზიდენტ კოლინდა გრაბარ-კატაროვიჩის შესახებ მთელმა მსოფლიომ გაიგო, როცა ის რუსეთში მსოფლიო ჩემპიონატზე, ხორვატიის ნაკრების მხარდასაჭერად ეკონომკლასის სამგზავრო რეისით ჩაფრინდა. მან მთელი ბავშვობა სოფლად გაატარა და ქვეყნის ხელმძღვანელობაზე არასდროს უფიქრია. მისი ოცნება სტიუარდესობა იყო.

კოლინდა ქალაქ რიეკაში დაიბადა, მაგრამ მთელი ბავშვობა იქვე მეზობელ სოფელში გაატარა, სადაც მის ოჯახს ფერმა და საყასბო ჰქონდა. მისი მშობლები გოგონას ოცნების წინააღმდეგნი არ იყვნენ, მაგრამ მანამდე სურდათ, მას კარგი განათლება მიეღო. 17 წლის კოლინდას შანსი გაუჩნდა აშშ-ში სწავლის გაგრძელების, ხოლო სამშობლოში დაბრუნების შემდეგ ის ზაგრების უნივერსიტეტის სტუდენტი გახდა.

საპრეზიდენტო არჩევნებამდე მან პარლამენტში იმუშავა, შემდეგ საგარეო საქმეთა მინისტრი და აშშ-ში ხორვატიის ელჩიც იყო.

46 წლის კოლინდა არა მხოლოდ ქვეყნის პირველი პრეზიდენტი ქალი, არამედ თანამედროვე ისტორიაში ქვეყნის ყველაზე ახალგაზრდა მმართველიც გახდა.

„მე არავის მივცემ უფლებას, ეჭვი შეიტანოს იმაში, რომ ხორვატია განვითარებული ქვეყანა არ გახდება“, - ამ ფრაზით დაიწყო გრაბარ-კიტაროვიჩმა ქვეყნის მმართველის როლში პირველი გამოსვლა.

ის ბედნიერია ქორწინებაში და ორი შვილიც ჰყავს - უმცროსი ვაჟი ლუკა და ქალიშვილი კატარინა. კოლინდას 17 წლის ქალიშვილი ციგურებით ფიგურულ სრიალში იუნიორთა შორის ხორვატიის ჩემპიონია.

ხორვატიის პრეზიდენტი თავისუფლად საუბრობს ინგლისურად, ესპანურად და პორტუგალიურად. იცის ცოტა იტალიური, ფრანგული და გერმანული.

2017 წელს ჟურნალმა Forbes-მა გრაბარ-კიტაროვიჩი მსოფლიოს ყველაზე გავლენიანი ქალების რიცხვში შეიყვანა.

ოფიციალურ შეხვედრებზე სხვა ქვეყნების ხელმძღვანელებს კოლინდა ხშირად ხორვატიის საფეხბურთო ნაკრების სახელობის მაისურებს ჩუქნის.

ხორვატები თავიანთი ქვეყნის ხელმძღვანელს სახალხო პრეზიდენტს უწოდებენ.

ის სასადილოში ქვეყნის მოქალაქეებთან ერთად ჩვეულებრივ საკვებს მიირთმევს და საზოგადოებრივი ტრანსპორტით დაბრძანდება. ბაზარშიც თავად არჩევს და ყიდულობს სურსათს.

2018 წლის ჩემპიონატზე ეკონომკლასით ჩაფრინდა და ხორვატიის ნაკრების მატჩებს ტრიბუნებიდან, რიგით მაყურებლებთან ერთად, ადევნებდა თვალყურს.

მიუხედავად ფინალურ შეხვედრაში მარცხისა, პრეზიდენტმა ყველა ფეხბურთელს ძალიან ამაღელვებლად გადაუხადა მადლობა.

პრეზიდენტი, რომელიც საკუთარ ხალხზე ისე ზრუნავს, როგორც საკუთარ ოჯახზე, უდავოდ აღტაცების ღირსია. კოლინდა ყველაფერს ასწრებს - მოსიყვარულე დედაცაა, ქვეყნის მმართველიც და ფეხბურთის თავგადაკლული ფანიც.