x
მეტი
  • 14.11.2018
  • სტატია:82699
  • ვიდეო:334242
  • სურათი:440281
ვიკინგები საქართველოში

ვიკინგები საქართველოში


სასირეთის ბრძოლა


გაინტერესებთ რატომ ვერ იქცა საქართველოში "ვიკინგი" - დაუმარცხებელის სინონიმად ისე, როგორც ეს ევროპის სხვა ქვეყნებში იყო? აი რაშია საქმე - 1047 წელს საქართველოში სამოქალაქო ომი მძვინვარებდა მეფე ბაგრატ მეოთხესა და კლდეკარის ერისთავ ლიპარიტ ბაღვაშს შორის. მათ შორის გადამწყვეტი ბრძოლა სწორედ კასპთან, სასირეთის ჭალასთან მოხდა. დაპირისპირპირებულმა მხარეებმა უცხოელებს უხმეს დასახმარებლად - ლიპარიტ ბაღვაშს მხარს უჭერდნენ ბიზანტიელები, მათი გარნიზონები სამხრეთ საქართველოს სტრატეგიულ ციხეებში იდგა. ბაგრატ მეფემ კი თავისი არმიის გასაძლიერებლად 3000 ვიკინგი მეომარი დაიქირავა შვედეთიდან. ბრძოლაში კი მათგან მხოლოდ 700-დან 1000-მდე ჩართო. ბრძოლის დაწყებას არცერთი მხარე არ აპირებდა. ბაგრატ მეოთხე დამატებით ძალებს ელოდა მესხეთიდან, მაგრამ ამ დროს საკუთარ სიმამაცეში ზედმეტად დარწმუნებულმა ვიკინგებმა სარდლობასთან შეუთანხმებლად იერიში მიიტანეს ლიპარიტ ბაღვაშის ბანაკზე, რამაც საქართველოს მეფე აიძულა ბრძოლაში მთელი ძალებით ჩართულიყო. ლიპარიტმა ქართველთა სამეფო ჯარს და ვიკინგებს მწარე დამარცხება აწვნევინა. ამის შემდეგ კიდევ 10 წლის განმავლობაში ლიპარიტი და ბაგრატი უწინდებურად განაგრძობდნენ სამკვდრო-სასიცოცხლო დაპირისპირებას, მაგრამ ვიკინგების მოწვევა არცერთ მხარეს აღარ გახსენებია. "ვიკინგი" - საქართველოში უძლეველის სინონიმად ვერ დამკვიდრდა. ხალხს კარგა ხანს ემახსოვრებოდა პურის საკაზმავად (პურის გასაცხრილად) დამსხდარი "უძლეველი" ვიკინგები, რომელთაც სამშობლოში დაბრუნება მხოლოდ ლიპარიტ ბაღვასის გულმოწყალების გამო მოახერხეს. დანარჩენი 2000 ვიკინგი კი, რომელიც ბაგრატ მეოთხემ არ ჩართო ბრძოლაში, ქუთაისთან ახლოს, სოფელ ბაშში დაასახლა. მათი შთამომავლები დღემდე ცხოვრობენ საქართველოში.


სასირეთის ბრძოლა


ცნობილია, რომ თამარ მეფესაც ემსახურებოდა მოწვეული "3000 ვარიაგი" (ვარიაგი იგივე ვიკინგია, ასე ეძახდნენ მათ ქართველები). "კავკასიაში, მთების კალთებზე არსებობს უძლიერესი ქრისტიანული სახელმწიფო - საქართველო, რომელსაც სათავეში ქალი უდგას და მისი სახელია თამარ. მას ემსახურება 3000 "ვარეაგირ" (ვიკინგი)." მე-13 საუკუნის სკანდინავიური ლიტერატურიდან.


თამარ მეფე


ეს არის ლექსი, რომელიც დაწერა საქართველოში, კერძოდ იმერეთში, სოფელ ბაშში დარჩენილ 2000 ვიკინგზე მე-19 საუკუნის დიდმა გერმანელმა პოეტმა ფრიდრიხ ჰოლდერლინმა:


ძნელია, ძნელი, მიატოვო წმინდა სავანე

სადაც შობილხარ, გიცხოვრია, გალაღებულხარ,

ასე ფიქრობენ, მსგავსი მხარე სად იქნებაო,

სად ვიცხოვრებთო ასე ლაღად და ბედნიერად?

მე კი მიმიწევს მაინც გული კავკასიაში!

რადგან მსმენია, თითქოს ზღაპრად გამიგონია,

რომ იქ მგოსნები მერცხლებივით დანავარდობენ -

მათი ხვედრია თავისუფლება!

გარდა ამისა ბავშვობაში მიამბეს ისიც,

რომ გერმანული ტომი ჩვენთა მამა-პაპათა

სამხრეთს წასულა, გაჰყოლია დუნაის ზვირთებს,

ჩრდილს დაეძებდა მზიან დღეში და მზის შვილებთან

შავი ზღვის პირას, გაშლილ ველზე დასახლებულა.

იმ დალოცვილი ქვეყნისათვის განა ტყუილად

უწოდებიათ სტუმართმოყვარე...

რადგან ესტუმრა კოლხებს უცხო ხალხი თუ არა,

მიუახლოვდნენ უცხოსა და ცნობისმოყვარეს.

ზეთისხილის ქვეშ დასვეს თურმე მშვიდობიანად.

უცხოდ ემოსათ, უცხო იყო ენაც მოსულთა,

და ვერაფერი ვერ გაუგეს ერთიმეორეს.

ის იყო უნდა ჩამოეგდოთ განხეთქილება,

მაგრამ ფოთლები აშრიალდნენ მაცოცხლებელნი,

სტუმარ-მასპინძელს გაებადრა ღიმილით სახე,

ერთხანს ერთმანეთს შესცქეროდნენ მშვიდი ღიმილით,

მერე მარჯვენა გაუწოდეს ერთი-მეორეს.

ძმურად გაცვალეს იარაღი, გაცვალეს სიტყვა,

სიამტკბილობა გადავიდა მამიდან შვილზე,

წმინდა კავშირი საქორწინო შეიკრა შემდეგ,

იზარდა ტომი!...

სად ცხოვრობ ახლა ხალხო ჩემო, სისხლო და ხორცო?!

რათა ხელახლა შევკრათ იგი კავშირი წმინდა

და მოვიგონოთ მამა-პაპა დაუვიწყარი?


ფრიდრიხ ჰოლდერლინი - დიდი გერმანელი პოეტი (1770 - 1843 წწ.)


ფრიდრიხ ჰოლდერლინი





ავტორი: თორნიკე ფხალაძე



1
713
6-ს მოსწონს
ავტორი:თორ ნიკე
თორ ნიკე
Mediator image
713
  
13 ივლისი, 11:37
ბაშში? ეს ნამდვილად არ ვიცოდი....და ბაშელი ვაშაკიძეებიც ვარიაგები არიან?
0 1 1