სოციალურ ქსელ "ფეისბუქში" კიდევ ერთი ახალი ქართული იუმორისტულ-დიდაქტიკური გვერდი გამოჩნდა, სახელწოდებით "მიბაძე ჯემალას". გვერდის მთავარი პერსონაჟია ვინმე ჯემალა, რომელიც ყველასათვის მისაბაძი მაგალითია. ჯემალა გვასწავლის სოციალური ქსელების სწორად გამოყენებას და ზოგადად, სწორად მოქმედებას, დასცინის სადღეისოდ გავრცელებულ უაზრო და ნაკლოვან ჩვევებს. ამგვარად იგი ერთი მხრივ იუმორისტულიცაა და დამრიგებლურ ხასიათსაც ატარებს.

გვერდის პოპულარობაზე მეტყველებს ის ფაქტი, რომ 3 დღეში 17 000-ზე მეტი მომწონებელი დააგროვა. როგორც საიტის ადმინისტრაცია აცხადებს, ეს არის მცდელობა შეიქმნას საქართველოსთვის რაიმე განსხვავებული, რაც სარგებელს მოუტანს ხალხს.

ქვემოთ გთავაზობთ „მიბაძე ჯემალას“ რამდენიმე, განსაკუთრებით საინტერესო შეგონებას, რომლებიც, როგორც წესი, სურათის სახით არის ხოლმე წარმოდგენილი.